اسرائیل دنیا کا سب سے خطرناک وائرس ہے: فلسطین فاؤنڈیشن
فلسطین فاؤنڈیشن کا کہنا ہے کہ اسرائیل 1948ء میں دنیا میں آنے والا سب سے خطرناک وائرس ہے۔
پاکستانی میڈیا کی رپورٹ کے مطابق فلسطین فاؤنڈیشن پاکستان کے مرکزی رہنماؤں صابر ابو مریم، علامہ قاضی احمد نورانی اور دیگر افراد نے کراچی پریس کلب میں پریس کانفرنس سے خطاب کیا۔ انہوں نے کہا کہ فلسطین پر قبضے اور ناجائز اسرائیل کے قیام مخالف فلسطینیوں کے یوم نکبہ اور عالمی یوم القدس کے پیش نظر، 15 سے 22 مئی تک ”القدس، شہداء کا راستہ“ کے زیر عنوان بیت المقدس کا ہفتۂ آزادی منایا جائے گا۔
انہوں نے کہا کہ حالیہ صورتحال اور لاک ڈاؤن کے پیش نظر ملک بھر میں بڑی سرگرمیاں انجام نہیں دی جا رہی ہیں تاہم فلسطین کے مظلوموں کو اس موقع پر کورونا سمیت اسرائیل کے رحم و کرم پر نہیں چھوڑا جا سکتا اور فلسطین فاؤنڈیشن پاکستان کے تحت ملک بھر میں سوشل میڈیا پر بھرپور مہم چلائی جائے گی جبکہ دیگر شہروں میں بھی پریس کانفرنسز کا انعقاد کر کےغاصب صہیونی ریاست اسرائیل کے ناپاک وجود کے خلاف احتجاج ریکارڈ کروایا جائے گا۔
فلسطین فاؤنڈیشن کے رہنماوں نے فلسطین کاز کی حمایت جاری رکھنے کا اعلان کرتے ہوئے حکومت پاکستان سے مطالبہ کیا کہ کہ وہ ملک میں موجود اسرائیل نواز لابی کے خلاف سخت کریک ڈاؤن کرے اور وزیر اعظم اپنی صفوں میں گھس جانے والے اسرائیلی ایجنٹوں کا صفایا کریں۔
