آل سعود کے اقدامات غیر اسلامی اور افسوسناک ہیں: پاکستانی مفتی
پاکستان کے مفتی تقی عثمانی نے آل سعود کے اقدامات کو غیر اسلامی قرار دیدیا۔
پاکستان کے معروف عالم دین مفتی تقی عثمانی نے سعودی حکومت کی سرگرمیوں کو اسلام مخالف قرار دیتے ہوئے کہا کہ حرمین شریفین اور حجاج کی بے مثال خدمت کی وجہ سے ہم ہمیشہ سعودی عرب کے مداح رہے ہیں لیکن اب جو افسوس ناک خبریں سوشل میڈیا پر اور کچھ براہ راست آرہی ہیں، وہ اسلامی روایات اور خود "ملک عبدالعزیز" کی روایات کے خلاف ہیں۔
مفتی تقی عثمانی کا کہنا تھا کہ حرم میں بے حجاب خواتین پولیس کی تعیناتی، نماز کے اوقات میں بازاروں کا کھول دینا جبکہ حج و عمرے پر پابندیاں اور سب سے بڑھ کر سنت کی اخبار آحاد کو حجت قرار نہ دینا، یہ باتیں نشاندہی کر رہی ہیں کہ سعودی عرب کا رخ بدل رہا ہے جس سے عالم اسلام، مسلم اقوام اور علماء سب تشویش میں ہیں، کیونکہ حرمین شریفین سے انکا والہانہ رشتہ ہے۔
یہ بھی دیکھئے: سعودی عرب کی اسرائیل نوازی پر کشمیری رہنما کی کڑی تنقید
مفتی تقی عثمانی نے اپنے بیان میں مشورہ دیا ہے کہ سعودی حکومت اپنے اس طرزعمل پر نظر ثانی کرکے اُسکی اصلاح کرے۔
اسلام ٹائمز کی رپورٹ کے مطابق کورونا وائرس کی آڑ کی میں سعودی حکومت کے حج و عمرہ پر پابندی لگانے کے ناقدین میں یمن کی تحریک انصار اللہ کے سربراہ سید عبد الملک بدر الدین الحوثی بھی شامل ہیں، انہوں نے اس عمل کو قرآنی اصولوں کے خلاف اور عالم اسلام کے خلاف ایک تخریبی رویہ قرار دیتے ہوئے اُسے برطانوی اور امریکی حکومت کی نگرانی میں انجام پانے والا ایک عمل قرار دیا ہے۔
سعودی عرب سے اچھے تعلقات استوار ہونے کے باوجود پہلی بار پاکستان سے سعودی حکومت اور آل سعود کے خلاف ایک مضبوط اور قوی آواز سامنے آئی ہے، جسے اپنے ہی مکتب کے جید علماء کی تنقید کا سامنا ہے۔
خیال رہے کہ مفتی تقی عثمانی پر انکے بے باکانہ بیانات کے باعث قاتلانہ حملے کیا جا چکے ہیں۔
