Mar ۲۵, ۲۰۲۰ ۱۹:۴۱ Asia/Tehran
  • کورونا کے پیش نظر پورے ہندوستان میں لاک ڈاؤن

ہندوستان میں کورونا وائرس کو کنٹرول کرنے کے لئے ملک گیر لاک ڈاؤن جاری ہے ۔

ہندوستان میں منگل اور بدھ کی درمیانی رات بارہ بجے سے ملک گیر لاک ڈاؤن جاری ہے۔ ہندوستان کے وزیر اعظم نریندر مودی نے منگل کی رات ٹی وی کے ذریعے قوم سے خطاب میں اعلان کیا کہ کورونا سے بچاؤ کے لئے پورے ملک کو اکیس دن کے لئے لاک ڈاؤن کیا جا رہا ہے۔
انہوں نے خبردار کیا کہ اگر ہم نے اکیس دن کے لاک ڈاؤن کو سنجیدگی سے نہیں لیا تو ہمیں اس کی بڑی قیمت چکانی ہوگی اور ہم اکیس سال پیچھے چلے جائیں گے - 
ہندوستانی میڈیا رپورٹوں کے مطابق پورے ہندوستان میں لاک ڈاؤن پر سختی سے عمل درآمد کرایا جا رہا ہے ۔ رپورٹوں میں بتایا گیا ہے کہ سبھی چھوٹے بڑے شہروں میں لاک ڈاؤن کو کامیاب بنانے اور لوگوں کو گھروں سے نکلنے سے روکنے کے لئے پولیس اور دیگر سیکورٹی دستوں کی مدد بھی لی گئی ہے۔ اس رپورٹ کے مطابق پولیس اور سیکورٹی اہلکار ، انتہائی ضرورت کے بغیر کسی کو بھی باہر نکلنے کی اجازت نہیں دے رہے ہیں۔
ذرائع ابلاغ کے مطابق ہندوستان میں کورونا وائرس میں پانچ سو باسٹھ افراد کے مبتلا ہونے کی تصدیق کی جا چکی ہے۔ بتایا گیا ہے کہ ہندوستان میں کورونا وائرس سے مرنے والوں کی تعداد دس جبکہ صحتیاب ہونے والوں کی تعداد اکتالیس بتائی گئی ہے۔ 
ہندوستانی حکومت نے اسی کے ساتھ کورونا وائرس میں معاون ہائیڈوکسل کلورو کوئن اور اس سے تیار کی جانے والی دیگر ادویات کی برآمدات پر مکمل پابندی کا بھی اعلان کر دیا ہے۔ 

ٹیگس

کمنٹس