SAHAR

ڈنمارک کی سابق وزیراعظم ہیلے تھورننگ نے جزیرہ گرین لینڈ خریدنے اور ڈنمارک کا اپنا دورہ منسوخ کرنے کے ٹرمپ کےفیصلے پر رد عمل کا اظہار کرتے ہوئے کہا کہ ٹرمپ نے اپنے اس رویّے سے ڈنمارک اور گرین لینڈ کے عوام کی توہین کی ہے۔ ڈنمارک کے سابق وزیرمالیات و تجارت راسموس جارلوف نے بھی امریکی صدر کے اس رویّے پر تنقید کرتے ہوئے کہا کہ میں ڈنمارک کے ایک شہری کی حیثیت سے ٹرمپ کے اس توہین آمیز رویّے سے سخت ناراض ہوں۔ ڈنمارک کے سابق وزیرتجارت نے کہا کہ ٹرمپ کو کس نے اس بات کی اجازت دی ہے کہ وہ جزیرہ گرین لینڈ خریدنے کی بات کریں۔ اس سے قبل ڈنمارک کی وزیراعظم میٹ فریڈ رکسن نے کہا تھا کہ گرین لینڈ قابل فروخت نہیں اور اس علاقے کو خریدنے کا ٹرمپ کا دعوی بیہودہ اور گھٹیا ہے۔ امریکی صدر ٹرمپ نے اپنا دورہ ڈنمارک کو جو دو اور تین ستمبر کو انجام پانے والا تھا منسوخ کردیا ہے۔ گرینلینڈ جو بحر اوقیانوس اور بحر منجمد شمالی کے درمیان واقع ہے ڈنمارک کے زیرتسلط خود مختار جزیرہ ہے۔اس جزیرے کی آبادی پینسٹھ ہزار ہے اور آبادی کے لحاظ سے دنیا کا سب سے چھوٹا علاقہ شمار ہوتا ہے۔