SAHAR

ہندوستانی خبررساں ایجنسی یو این آئی کے مطابق منگل کو ہندوستانی سپریم کورٹ کے جسٹس وائی چندر چوڑ اور جسٹس ہیمنت گپتا پر مشتمل دو رکنی بینچ نے مدھیہ پردیش کی سیاسی صورتحال اور ریاستی اسمبلی میں فلور ٹسٹ کے تعلق سے بی جے پی کے سینیئر لیڈر اور سابق وزیر اعلی شیوراج چوہان اور دیگر افراد کی عرضیوں پر، مدھیہ پردیش کے وزیر اعلی کمل ناتھ اور دیگر مدعا علیہان کو نوٹس جاری کردیئے ہیں۔

سپریم کورٹ کی دو رکنی بینچ نے بدھ تک جواب جمع کرانے کا حکم دیا ہے اور اعلان کیا ہے کہ اس کیس کی سماعت بدھ کو ساڑھے دس بجے ہو گی۔ 

قابل ذکر ہے کہ مدھیہ پردیش کے سابق وزیر اعلی شیوراج چوہان اور ریاستی اسمبلی کے نو دیگر ارکان نے سپریم کورٹ میں عرضی دائر کر کے، اسمبلی اسپیکر پر فلور ٹیسٹ ٹالنے کا الزام لگایا ہے۔ عرضی گزاروں نے سپریم کورٹ سے درخواست کی ہے کہ ریاستی حکومت کو جلد از جلد اسمبلی میں اکثریت ثابت کرنے کا حکم دیا جائے۔ 

یاد رہے کہ ہندوستان کی ریاست مدھیہ پردیش میں آدتیہ سندھیا اور بائیس کانگریسی اراکین اسمبلی کے استعفے کے بعد سیاسی بحران پیدا ہوگیا ہے اور بی جے پی رہنما، کمل ناتھ حکومت سے اسمبلی میں اکثریت ثابت کرنے کا مطالبہ کر رہے ہیں۔