دہلی کی جواہر لال نہرو یونیورسٹی میں اے بی وی پی اور اے آئی ایس ایف کے درمیان تصادم میں متعدد طلبا زخمی ہوگئے۔

نئی دہلی سے یو این آئی کی رپورٹ کے مطابق جواہر لال نہرو یونیورسٹی جے این یو میں اکھل بھارتیہ ودیارتھی پریشد اے بی وی پی اور بائیں بازو کی طلبا تنظیم آل انڈیا اسٹوڈنٹ ایسوسی ایشن اور اسٹوڈنٹس فیڈریشن آف انڈیا کے ارکان کے درمیان جھڑپ ہوگئی۔

بتایا گیا ہے کہ اس تصادم میں کم سے کم بارہ طلبا زخمی ہوگئے جن میں سے تین کو سنگین زخم آئے ہیں۔ جے این یو کی طلباء یونین کے ارکان نے بتایا ہے کہ تصادم میں شدید زخمی ہونے والوں کا نئی دہلی کے ایمس میں علاج کیا جا رہا ہے۔ رپورٹ کے مطابق اس واقعہ کی باقاعدہ شکایت دہلی پولیس سے کی گئی ہے۔

عینی شاہدین نے بتایا کہ یہ واقعہ اتوار کی رات تقریباً دس بجے یونیورسٹی کے طلبہ یونین کے دفتر میں پیش آیا۔ دونوں فریقوں کے ارکان ایک دوسرے پر تشدد شروع کرنے کا الزام لگا رہے ہیں۔