اسلامی انقلاب کے دشمنوں کی سازشیں ناکام ! - ویڈیو
ایران کے عوام نے آج ملک کے مختلف شہروں میں احتجاجی مظاہرے کر کے اور ریلیاں نکال کر حالیہ دنوں میں دشمنوں اور شر پسند عناصر کی جانب سے نجی املاک کو نقصان پہنچانے کی بھر پور مذمت کی۔
اسلامی جمہوریہ ایران کے غیور عوام نے آج صبح دہلران،اہواز،ایذہ، کرمانشاہ، اصفہان، لرستان، ہمدان سمیت دوسرے شہروں میں ریلیاں نکال کر حالیہ دنوں میں دشمنوں اور شر پسند عناصر کی سازشوں کی مذمت کی اور بانی انقلاب اسلامی امام خمینی (رح) اوررہبر معظم انقلاب اسلامی حضرت آیت اللہ العظمی سید علی خامنہ ای کی امنگوں سے تجدیدعہد کیا۔
مظاہرین نے جن کی تعداد لاکھوں میں تھی امریکہ مردہ باد،اسرائیل مردہ باد کے نعرے لگاتے ہوئے شرپسند عناصراور اقتصادی بدعنوانی میں ملوث افراد کے خلاف کارروائی کرنے کا مطالبہ کرتے ہوئے اقتصادی مسائل کے حل اور بے روزگاری سے نمٹنے پر تاکید کی۔
حالیہ دنوں میں رونما ہونے والے واقعات کے خلاف کل جمعرات اور جمعہ کے روز بھی ایران کے مختلف شہروں میں مظاہرے کئے جائیں گے۔
واضح رہے کہ گزشتہ پانچ روز کے دوران ایران کے مختلف شہروں میں مہنگائی اوراقتصادی صورتحال کے خلاف پرامن احتجاج کیا گیا جس میں عوام نے حکومت سے مہنگائی اور افراط زر سے متعلق مسائل کے جلد حل کا مطالبہ کیا.تاہم ان احتجاجی مظاہروں میں بعض شرپسند عناصر شامل ہوئے جن کا مقصد مختلف شہروں میں پرامن احتجاج کو پر تشدد رنگ دینا تھا ۔
