SAHAR

شمالی صوبے کرمانشاہ کے سرحدی علاقوں کے دورے کے موقع پر سپاہ پاسدران کے افسروں اور جوانوں سے خطاب کرتے ہوئے  بریگیڈیئر جنرل حسین سلامی کا کہنا تھا کہ ایرانی عوام کی استقامت کے نتیجے میں دشمن بے بسی اور سیاسی افسردگی کا شکار ہو گئے ہیں۔

 انہوں نے کہا کہ دشمنوں نے اتحاد  قائم کر کے ایران پر سیاسی،  اقتصادی اور فوجی لحاظ سے دباؤ ڈالنے کی بھرپور کوشش کی لیکن آج دشمن کے تمام ستونوں میں کمزوری اور زوال کا بخوبی مشاہدہ کیا جا سکتا ہے۔

 جنرل حسین سلامی نے دشمن کے مقابلے میں ملت ایران کی کامیابیوں کو رہبر انقلاب اسلامی کی رہنمائی کا نتیجہ قرار دیتے ہوئے کہا کہ آج علاقے میں اسلامی انقلاب کے نظریے کے مطابق اسرائیل کو شکست دینے والی افواج تشکیل پا رہی ہیں۔

سپاہ پاسداران انقلاب اسلامی کے کمانڈر نے ایک بار پھر یہ بات زور دے کر کہی کہ دشمن علاقے میں جھڑپوں اور جنگ سے گریزاں ہے تاہم میں واضح کردینا چاہتا ہوں کہ اگر علاقے میں نئی جنگ چھڑی تو صیہونی حکومت کو سب سے زیادہ خطرہ لاحق ہو گا اور اسے زوال سے کوئی نہیں بچا سکے گا۔