SAHAR

ترکمانستان کے سیاحتی علاقے آوازہ میں کیسپیئن اکنامک فورم کے پہلے اجلاس سے خطاب کرتے ہوئے اسحاق جہانگیری کا کہنا تھا کہ کسی بھی نام اور اتحاد کے عنوان سے بیرونی طاقتوں کی موجودگی خطے کی سلامتی اور استحکام کے لیے انتہائی خطرناک ہوگی۔ایران کے نائب صدر نے واضح کیا کہ عالمی آبی گزرگاہوں، جنوبی اور شمالی ساحلوں اور آبنائے ہرمز کی سلامتی ہماری ریڈ لائن ہے اور اس معاملے پر کسی  سے کوئی رعایت نہیں برتی جائے گی۔اسحاق جہانگیری نے ایک بار پھر ایران کے دیرینہ اور اصولی موقف کا اعادہ کیا کہ خطے کی سلامتی کا تحفظ خطے کے ملکوں کے درمیان باہمی تعاون کے ذریعے ہی ممکن ہے۔نائب صدر نے کہا کہ ہمسایہ ملکوں کے ساتھ تعاون کا فروغ اور ہر قسم کی کشیدگی سے گریز اسلامی جمہوریہ ایران کی خارجہ پالیسی کا بنیادی ستون ہے۔ انہوں نے کہا کہ تہران،  وسطی ایشیا اور کیسپیئن سی کے تمام ساحلی ملکوں کے ساتھ تمام شعبوں میں تعاون کا خیر مقدم کرتا ہے۔