ایران اور پاکستان کے اسپیکروں کی ملاقات
اسلامی جمہوریہ ایران اور پاکستان کے پارلیمانی اسپیکروں نے مختلف میدانوں خاص طورپر اقتصادی میدان میں باہمی تعلقات کو فروغ دینے پر زور دیا ہے
ایران کی پارلیمنٹ کے اسپیکر ڈاکٹر علی لاریجانی نے بلغراد میں آئی پی یو کے اکتالیسویں اجلاس کے موقع پر پاکستان کی قومی اسمبلی کے اسپیکر اسد قیصر سے ملاقات میں ایران اور پاکستان کی مشترکہ ثقافت اور موقف کی جانب اشارہ کرتے ہوئے کہا کہ پاکستان کے سلسلے میں ایران میں مثبت اور اچھے نظریات پائے جاتے ہیں - انہوں نے مسئلہ کشمیر پر ہندوستان اور پاکستان کے اختلافات کے حل کی امید کا اظہارکرتے ہوئے کہاکہ اقتصادی میدان میں ایران اور پاکستان کے درمیان کام کم ہو رہا ہے اسی لئے اس میدان میں مدد کی ضرورت ہے تاکہ علاقے کے دو اہم ممالک کی حیثیت سے ایران اور پاکستان اپنی توانائیوں سے بھرپور فائدہ اٹھاسکیں ۔ پاکستان کی قومی اسمبلی کے اسپیکر اسد قیصر نے بھی وزیراعظم پاکستان کے حالیہ دورہ تہران میں ایران کی جانب سے ان کا پرتپاک استقبال کئے جانے اور کشمیری عوام کے لئے ایران کی حمایت کا شکریہ ادا کرتے ہوئے کہا کہ اقتصادی میدان میں دونوں ملکوں کے تعلقات میں توسیع پاکستان اور ایران کی ترقی و پیشرفت میں مدد گار ثابت ہوگی -
