تہران - ٹوکیو دفاعی تعاون کو مستحکم کرنے کے لئے پر عزم
ایران اور جاپان نے دفاعی شعبے میں تعاون جاری رکھنے پر زوردیا ہے۔
ایران اور جاپان کے وزرائے دفاع نے تہران اور ٹوکیو کے مابین دفاعی تعاون کو مستحکم کرنے اور دونوں ممالک کے فوجی عہدیداروں کے درمیان صلاح و مشورے کا عمل جاری رکھنے پر زور دیا ہے۔
یہ بات ایرانی وزیر دفاع بریگیڈیئر جنرل ' امیر حاتمی' اور جاپانی وزیر دفاع' کیشی نوبو' ایک ویڈیو لنک میں گفتگو کے بعد سامنے آئی۔
ارنا کی رپورٹ کے مطابق ایران کے وزیر دفاع نے اپنے جاپانی ہم منصب کو ان کی تقرری پر مبارکباد پیش کرتے ہوئے دونوں ممالک کے مابین باہمی تعلقات کو فروغ دینے پر زور دیا۔
جاپانی وزیر دفاع نے مشرق وسطی میں جاپانی بحری جہازوں کی سیکورٹی کو یقینی بنانے کے لئے معلومات اکٹھا کرنے کی سرگرمیوں میں توسیع کی وضاحت کرتے ہوئے ایران سے بحری جہازوں خاص طور پر جاپانی جہازوں کی حفاظت کو یقینی بنانے میں باہم تعاون کرنے کی خواہش ظاہر کی۔
دونوں ممالک کے وزرائے دفاع نے مشرق وسطی کی موجودہ صورتحال پر تبادلہ خیال کرتے ہوئے دفاعی عہدیداروں کی سطح پر تہران اور ٹوکیوں کے درمیان اتفاق رائے جاری رکھنے پر زور دیا۔
جاپانی وزارت دفاع نے بھی ایک بیان میں کہا کہ مشرق وسطی میں امن و استحکام کا قیام جاپان سمیت پوری دنیا کے امن اور سیکورٹی کے لئے انتہائی اہم ہے اور مشرق وسطی میں جاپانی بحری جہازوں کی حفاظت کو یقینی بنانا بھی ضروری ہے۔
