SAHAR

بحرینی عوام کی پرامن تحریک کو کچلنے کے لئے آل خلیفہ حکومت اور امریکا کے درمیان جاری تعاون کے سلسلے میں امریکی فوج کی سینٹرل کمان کے ڈپٹی کمانڈر نے منامہ میں بحرینی فوج کے سربراہ سے ملاقات کی ہے۔

بحرین کی سرکاری خبر رساں ایجنسی بنا نے خبر دی ہے کہ امریکی فوج کی سینٹرل کمان کے ڈپٹی کمانڈر مارک فاکس نے بدھ کو بحرینی فوج کے سربراہ خلیفہ بن احمد آل خلیفہ سے ملاقات کی اور دو طرفہ سیکورٹی اور دفاعی معاملات پر تبادلہ خیال کیا۔

مذکورہ امریکی فوجی عہدیدار نے ایک فوجی وفد کے ہمرا بحرینی فوج کے سربراہ سے ملاقات کی۔

واضح رہے کہ بحرینی عوام کی پرامن عوامی انقلابی تحریک کے آغاز سے ہی امریکا نے ہمیشہ آل خلیفہ حکومت کی وسیع پیمانے پر ہتھیاروں کی مدد کی ہے جبکہ آل خلیفہ حکومت کے جرائم اور مظالم پر بھی امریکی حکام نے خاموشی اختیار کی ہے۔