SAHAR

شامی فوج نے لاذقیہ کے اطراف میں اسٹریٹیجک چوٹیوں پر کنٹرول حاصل کرلیا ہے

العالم کی رپورٹ کے مطابق شامی فوج نے شمالی شام کے علاقے لاذقیہ کے اطراف کی اسٹریٹیجک چوٹیوں پر کنٹرول حاصل کرنے کے ساتھ ہی جبھۃ النصرہ اور اس سے وابستہ دیگر دہشت گرد گروہوں کے متعدد افراد کو موت کے گھاٹ اتار دیا -

شامی فوج اور دہشت گرد گروہوں کے درمیان دیگر علاقوں میں بھی لڑائی ہوئی ہے- شامی فضائیہ نے جنوب مشرقی حمص میں القریتین اور تدمر کے اطراف میں داعش کے ٹھکانوں پر بمباری کی ہے- شام کے طیاروں نے شمالی اور اسی طرح مغربی دیرالزور میں بھی داعش کے ٹھکانوں کو نشانہ بنایا ہے اور ان کی کوشش ہے کہ الشعلہ اور تدمر کی جانب سے داعش کے لئے رسد کی فراہمی کے راستے کو منقطع کردیں-

شامی فوج کی یہ کارروائیاں ، داعش کے زیر قبضہ علاقوں پر کنٹرول حاصل کرنے اور داعش کے افراد کو ہدف بنانے کے مقصد سے جاری ہیں-

المیادین چینل نے اعلان کیا ہے کہ درعا کے علاقے صلاح المسالمہ سے موسوم علاقے میں جبھۃ النصرہ گروہ کا فوجی کمانڈر مارا گیا ہے- ساتھ ہی یہ بھی کہا گیا ہے کہ داعش دہشت گردوں نے درعا کے ایک علاقے پر قبضہ کرلیا ہے-

دمشق میں باخبر ذرائع کا کہنا ہے کہ شام کے مختلف علاقوں میں مسلح گروہ، جنگ بندی کی مسلسل خلاف ورزی کر رہے ہیں جبکہ شامی فوج ، دہشت گردوں کے جارحانہ اقدامات اور جنگ بندی کی خلاف ورزی کا جواب دینے سے اجتناب کر رہی ہے-