امریکہ کی اسلام دشمن پالیسی واضح اور آشکارا
علامہ راجہ ناصر عباس جعفری نے کہا ہے کہ مسلمانوں کے قلب میں گھونپے گئے اسرائیلی خنجر نے عالم اسلام کو زخمی کر رکھا ہے۔
مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نے وحدت ہاؤس کراچی میں استحکام پاکستان و امام مہدیؑ کانفرنس کے سلسلہ میں منعقدہ صوبائی و ڈویژنل ذمہ داران کے اجلاس سے خطاب کرتے ہوئے کہا کہ وہ دن دور نہیں کہ جب قبلہ اول بیت المقدس اسرائیلی قبضہ سے آزاد ہوگا، ہمارے فلسطینی بھائی واپس اپنے گھروں کو جائیں گے اور غاصب اسرائیل کے ساتھ ساتھ اس کے سہولت کار بھی نیست و نابود ہوں گے۔
انہوں نے کہا کہ 69 برس ہوگئے، کسی دن ایسا نہیں ہوا کہ اس ارضِ مقدس فلسطین پر بے گناہ مسلمانوں کا خون نہ گرا ہو اور کوئی شام ایسی نہیں ہوئی کہ کسی ماں کی گود نہ اْجڑی ہو، یہاں ہر روز قیامت ہے، ہر دن بلا ہے، ہر لمحہ مصیبت ہے، ہر ساعت دکھ، درد اور ابتلا ہے، یہاں ہر روز زلزلے برپا کئے جاتے ہیں۔
علامہ راجہ ناصر عباس جعفری نے کہا کہ بانی انقلاب اسلامی حضرت امام خمینیؒ کی فکر اور شہید قائد علامہ سید عارف حسین الحسینیؒ کے فرمان پر عمل کرتے ہوئے پاکستان کے امامیہ نوجوانوں نے امریکہ کی اسلام دشمن پالیسی کی وجہ سے 16 مئی کو یوم مردہ باد امریکہ منانے کا سلسلہ شروع کیا ، تاکہ اس پاک وطن میں امریکہ و استعماری مظالم کو آشکار کیا جاسکے، اس روز دنیا کو یہ بتانا ہوتا ہے کہ امریکہ ہی ہے جو مسلمانوں کی تمام تر مصیبتوں کا ذمہ دار ہے۔
مجلس وحدت مسلمین کے سیکرٹری جنرل کا کہنا تھا کہ ہم کل بھی امریکہ کی سرپرستی میں اسرائیل کے جارحانہ اقدامات نیز اس کے ظالمانہ، متکبرانہ اور جارحانہ رویوں کی وجہ سے اسے مردہ باد کہتے تھے، آج بھی کہتے ہیں اور اس وقت تک کہتے رہیں گے کہ جب تک دنیا اس کے نجس وجود سے پاک نہیں ہو جاتی اور امت اسلامی اپنا کھویا ہوا مقام حاصل نہیں کر لیتی۔
واضح رہے کہ آج پاکستانی عوام امریکہ سے اظہار نفرت کے لئے یوم مردہ باد امریکہ منا رہے ہیں۔
