روہنگیا مسلمانوں کا قتل عام بند کیا جائے، او آئی سی
اسلامی تعاون تنظیم کے سربراہی اجلاس کے بیان میں روہنگیا مسلمانوں کے خلاف تشدد بند کرنے، انسان دوستانہ امداد کی فراہمی اور بےگھر ہونے والوں کی بحالی کی ضرورت پر زور دیاگیا ہے۔
قزاقستان کے دارالحکومت آستانہ میں سائنس و ٹیکنالوجی کے موضوع پر ہونے والے اسلامی تعاون تنظیم کے سربراہی اجلاس میں روہنگیا مسلمانوں کی صورتحال کا بھی جائزہ لیا گیا۔ اجلاس میں روہنگیا مسلمانوں کے خلاف حکومت میانمار کے مجرمانہ اور تشدد آمیز اقدامات پر سخت تشویش کا اظہار کرتے ہوئے صوبہ راخین کے مسلمانوں کے خلاف میانمار کی فوج کے حملے فوری طور پر بند کرنے کا مطالبہ کیا گیا۔سربراہی اجلاس کے اختتامی بیان میں روہنگیا پناہ گزینوں کی امداد کے لیے اسلامی ملکوں کی مشترکہ کوششوں کی ضرورت پر زور دیا گیا ہے۔میانمار کی فوج اور انتہا پسند بدھسٹوں کے ہاتھوں روہنگیا مسلمانوں کے قتل عام پر اسلامی دنیا میں سخت غم وغصے کی لہر دوڑ گئی ہے اور ایران، پاکستان، انڈونیشیا اور ملائیشیا نے اس معاملے پر باضابطہ احتجاج کیا ہے۔
