پاکستان اور ہندوستان میں چہلم امام حسین(ع)
پاکستان اورہندوستان میں آج چہلم امام حسین(ع) عقیدت و احترام کے ساتھ منایا جا رہا ہے۔ چہلم حضرت امام حسین (ع) کے موقع پر سکیورٹی کے سخت انتظامات کئے گئے ہیں۔
نواسہ رسول حضرت امام حسین علیہ السلام اور ان کے 72اصحاب باوفا کا چہلم پاکستان اور ہندوستان میں انتہائی عقیدت و احترام کے ساتھ منایا جا رہا ہے۔
پاکستان اورہندوستان سے موصولہ خبروں میں بتایا گیا ہے کہ لاہور، کراچی،کوئٹہ، راولپندڈی، پیشاور اور اسی طرح دہلی،ممبئی، لکھنو، حیدرآباد، سری نگر اور کرگل سمیت ملک کے سبھی چھوٹے بڑے شہروں میں سیدالشہدا کے چہلم کے موقع پر جلوسہائے عزا برآمد ہونے کا سلسلہ شروع ہو گیا ہے اور مجالس غم برپا ہورہی ہیں۔
مومنین اور سوگواروں نے شبیہ تابوت و علم اور تبرکات کی زیارت کی اور بہت بڑی تعداد میں ماتمی انجمنوں نے منظم انداز میں نوحہ خوانی اور سینہ زنی کر کے کربلا والوں کی یاد منائی-
حیدر آباد، دہلی، سری نگر اور کرگل سے بھی چہلم سید الشہدا کے جلوس برآمد ہوئے- جن کے دوران روح پرور اور معنوی مناظر دیکھنے کو ملے اور جلوسہائے عزا میں شریک سوگواروں نے امام عالیمقام کی بے مثال قربانیوں کو یاد کرتے ہوئے ان کے راستے کو جاری رکھنے کا عزم کیا- پاکستان اور ہندوستان میں نکالے گئے جلوسہائے عزا کے راستوں میں سبیل اور نذر و نیازکا بھرپور اہتمام کیا گیا ہے۔
چہلم حضرت امام حسین(ع) کی مجالس عزا کا سلسلہ کل رات سے شروع ہوا اس دوران خطبا اور ذاکرین نے میدان کربلا میں امام حسین علیہ السلام اور ان کے اصحاب و انصار کی لازوال قربانی کے فلسفے اور مقصد پر روشنی ڈالی اور اس بات پر زوردیا کہ کربلا کے میدان میں حضرت امام حسین(ع) نے عالم انسانیت کو باطل قوتوں ، ظلم و جبر و تشدد اور ناانصافیوں کے خلاف اٹھ کھڑے ہونے اور طاغوتی طاقتوں کے سامنے نہ جھکنے کا جو پیغام دیا تھا وہ آج پوری دنیا کی قوموں کے لئے مشعل راہ بنا ہوا ہے اور جہاں جہاں بھی حریت و آزادی اور انصاف و سچائی کی تحریکیں جاری ہیں وہ امام عالیمقام کے آفاقی اور جاودانی پیغام کا ہی نتیجہ ہیں-
* سحرعالمی نیٹ ورک غم و اندوہ کے اس موقع پراپنے تمام ناظرین، سامعین اورکرم فرماوں کی خدمت میں دلی تعزیت و تسلیت پیش کرتا ہے*
