فلسطینیوں کی حمایت میں پاکستان کی آواز بلند رہے گی: پاکستانی وزیراعظم شہباز شریف
پاکستان صیہونی ظلم و جبر کے شکار نہتے فلسطینیوں کی سفارتی اور اخلاقی مدد جاری رکھے گا
سحرنیوز/پاکستان: پاکستان کے وزیراعظم شہباز شریف نے فلسطینیوں پر ڈھائے جانے والے انسانیت سوز صیہونی مظالم کی سخت الفاظ میں مذمت کرتے ہوئے اس عزم کا اظہار کیا ہے کہ پاکستان مظلوم فلسطینی عوام کے لیے آواز بلند کرتا رہے گا۔
شہباز شریف اور امیر جماعت اسلامی حافظ نعیم الرحمان کے درمیان ٹیلیفونک رابطہ ہوا، جس میں دونوں رہنماؤں نے غزہ میں جاری اسرائیلی ظلم و جبر پر گہری تشویش کا اظہار کیا۔
شہباز شریف نے کہا کہ پاکستان غزہ میں امداد کی ترسیل اور فلسطینی عوام کی سفارتی و اخلاقی مدد جاری رکھے گا، اور انسانی بنیادوں پر کھانے پینے کی اشیاء کی فراہمی کے لیے سفارتی کوششیں تیز کی جائیں گی۔
اس دوران شہباز شریف نے الخدمت فاؤنڈیشن کی خدمات کو سراہا اور کہا کہ تنظیم نے ملک گیر مہم کے ذریعے غزہ میں امدادی سامان کی فراہمی یقینی بنائی ہے۔
حافظ نعیم الرحمان نے گفتگو میں بتایا کہ فلسطینی رہنماؤں نے اُن سے رابطہ کر کے شہباز شریف سے جنگ بندی میں کردار ادا کرنے اور غذائی امداد کی فراہمی میں قائدانہ پیش قدمی کی اپیل کی ہے۔