مرحوم جناب مختار مسعود کی کتاب" لوحِ ایّام" سے خوبصوت اقتباس
May ۲۷, ۲۰۱۷ ۱۷:۳۴ Asia/Tehran
تلخیص آر اے نقوی
تھانوں اور چھاﺅنیوں پر عوامی قبضے سے بات چلی اور دور تک نکل گئی۔ عوام نے ریڈیو اور ٹی وی اسٹیشن پر قبضہ کرلیا۔ عوام نے وزیر اعظم کے دفتر اور گلستان پیلس پر قبضہ کرلیا۔ تہران کے مارشل لا ایڈمنسٹریٹر کو گرفتار کرلیا.ریڈیو کہتا ہے "توجہ بفرمائید۔۔۔ این صدائے انقلاب است۔" ٹی وی پر نیا ترانہ بجایا گیا۔ اس نئے ترانے کے ساتھ نیا ایران وجود میں آگیا۔ اس وقت شام کے سات بجے ہیں۔ بادشاہت کا سورج غروب ہوگیا ہے۔ میں نے اسے غروب ہوتے ہوئے خود اپنی آنکھوں سے دیکھا ہے۔آج اتوار کا دن ہے۔ گیارہ تاریخ ہے۔ مہینہ فروری کا ہے۔ سال عیسوی 1979ع ہے۔ شام کا وقت ہے۔ میں موم بتی کی روشنی میں روزنامچہ لکھ رہا ہوں۔ خوشی کے مارے موم بتی کی آنکھوں میں آنسو بھر آئے ہیں۔ ( "لوحِ ایّام" سے اقتباس )
