سات ہزار چھے سو بیس میٹر کی بلندی سے پیراشوٹ کے بغیر چھلانگ
جس وقت کہنہ مشق امریکی اسکائی ڈائیور لیوک ایکنس نے جرائت مندانہ طریقے سے سات ہزار چھے بیس میٹر یا تقریبا پچیس ہزار فٹ کی بلندی سے پیراشوٹ کے بغیر چھلانگ لگائی تو لوگ اسے دیوانہ کہہ رہے تھے۔
بیالیس سالہ ایکنس نے ریاست کیلی فورنیا کی سیمی ویلی میں ایسا کارنامہ رقم کیا جس کی مثال تاریخ میں نہیں ملتی۔ جب اس امریکی مہم جو نے ہوائی جہاز سے چھلانگ لگائی تو اس وقت سے لیکر ساڑھے تین بائی سا ڑھے تین مربع میٹر کے جال پر گرنے تک، اس کی بیوی سمیت سیکڑوں لوگوں کی سانسیں رکی رہیں۔
لچکدار جال پر گرنے کے بعد ایکنس نے چند سیکنڈ کا جو وقفہ دیا اس نے بہت سوں کو پریشان کردیا لیکن جب وہ اٹھا اور اپنے ہاتھ ہلا کر کامیابی کا اعلان کیا تو سب کو یقین ہوگیا کہ اس کی اٹھارہ مہینے کی محنت رنگ لے آئی ہے۔ خود ایکنس نے بھی پچیس ہزار فٹ کی بلندی سے چھلانگ لگانے کے اس تجربے کو انتہائی خطرناک تاہم حیرت انگیز قرار دیا۔
لیوک ایکنس کے ساتھ تین اور ڈائیور بھی تھے تاہم وہ پیراشوٹ پہنے ہوئے تھے اور زمین کے قریب پہنچتے ہی ان سب نے اپنے پیراشوٹ کھول لئے تھے۔ اسکائی ڈائیونگ کا یہ انوکھا تجربہ براہ راست مگر تھوڑے سے وقفے کے ساتھ ٹیلی ویژن پر دکھایا جارہا تھا۔
