SAHAR

اقوام متحدہ کے ہائی کمشنر برائے انسانی حقوق نے ہناہ گزینوں کے ساتھ ہنگری کے حکام کے رویے کو عالمی قوانین کے برخلاف قرار دیا ہے

سوئس نیوز ایجنسی کی رپورٹ کے مطابق زید رعد الحسین نے پناہ گزینوں کے ساتھ ہنگری کے حکام کے رویے پر تعجب کا اظہار کرتے ہوئے کہا ہے کہ بوڈاپسٹ نے عالمی قوانین کی خلاف ورزی کی ہے۔

اقوام متحدہ کے ہائی کمشنر برائے انسانی حقوق زید رعد الحسین نے کہا ہے کہ ہنگری اور صربیہ کی سرحد پر پناہ گزینوں پر آنسو گیس کے گولے داغنا اور واٹر کینن سے حملے کرنا غیرانسانی اقدام ہے۔ انہوں نے کہا انہوں نے ٹی وی پر یہ تصویریں دیکھی ہیں۔

زید رعد الحسین کے مطابق حالیہ دنوں میں ہنگری کے حکام کے اقدامات منجملہ پناہ گزینوں کو ملک میں داخل ہونے سے روکنا، انہین گرفتار کرنا اور انہیں عدالتی کارروائی کے بغیر واپس بھیج دینا عالمی قوانین کے برخلاف ہے۔

 انہوں نے پناہ گزینوں کے خلاف غیر مناسب طریقے سے طاقت کے استعمال اور صحافیوں پر حملے نیز ان کے کیمرے چھین لینے کی مذمت کی۔ زید رعد الحسین نے ہنگری میں پناہ گزینوں اور مسلمانوں کے خلاف رجحان کی مذمت کی۔

واضح رہے کہ حالیہ دنوں میں ہنگری کے حکام نے اپنی سرحدوں پر پناہ گزینوں کے ساتھ غیر انسانی سلوک کیا ہے جس پر انسانی حقوق کی تنظیموں نے احتجاج کیا ہے۔