SAHAR

میانمار میں حزب اختلاف کی رہنما آنگ سان سوچی کی پارٹی نے عام انتخابات میں دوتہائی سے زیادہ اکثریت حاصل کرلی ہے

گذشتہ ہفتے ہونےوالے انتخابات کے اسّی فیصد نتائج کا اعلان کردیا گیا ہے جن کے مطابق آنگ سان سوچی کی پارٹی نیشنل لیگ فار ڈیموکریسی اب تک تین سو اڑتالیس نشستیں جیت چکی ہے یوں مجموعی طور پر این ایل ڈی نے اسّی فیصد سے زیادہ نشستیں جیت لی ہیں - میانمار کے الیکشن کمیشن کی جانب سے نتائج کا اعلان سست رفتاری سے کیا جا رہا ہے تاہم جمعے کو ہونے والے نتائج کے مطابق اب آنگ سان سوچی کی جماعت ملک میں حکومت بنانے کے ساتھ ساتھ ملک کا صدر بھی خود ہی منتخب کرسکے گی -میمانمار میں انیس سو ساٹھ کے عشرے سے فوجی حکومت تھی اور اب اس ملک میں بڑے پیمانے پر سیاسی تبدیلی رونما ہو رہی ہے - آنگ سان سوچی کو پارلیمان کے دونوں ایوانوں میں اکثریت حاصل ہوگئی ہے جس کے تحت وہ صدر کا انتخاب کرنے کے ساتھ ساتھ حکومت بھی بنا سکتی ہیں - مبصرین کا کہنا ہے کہ اگرچہ میانمار میں ابھی بھی فوج کافی طاقتور ہے لیکن مستقبل میں آنگ سان سوچی اور فوج کے درمیان رسّہ کشی کے ماحول میں واضح اکثریت سے ملنے والی یہ فتح آنگ سان سوچی کے لئے کافی فائدے مند ثابت ہوگی -