کورونا ویکسین کی امیر اور غریب ممالک میں غیر منصفانہ تقسیم
عالمی ادارہ صحت نے کورونا ویکسین کی امیر اور غریب ممالک میں غیر منصفانہ تقسیم پر تشویش ظاہر کی ہے۔
عالمی ادارہ صحت کے ڈائریکٹر جنرل ٹیڈروس ادھانوم غیبریسس نے دنیا بھر میں کورونا ویکسین کی امیر اور غریب ممالک میں غیر منصفانہ تقسیم پر تشویش کا اظہار کیا ہے۔
ورلڈ ہیلتھ آرگنائزیشن کے ڈائریکٹر جنرل ٹیڈروس ادھانوم غیبریسس نے کورونا وائرس کی عالمی سطح پر تقسیم کو امتیازی اور غیر منصفانہ قرار دیتے ہوئے کہا کہ امیر اور غریب ممالک کے درمیان کورونا وائرس ویکسین کی تقسیم میں چونکا دینے والا عدم توازن ہے۔
عالمی اداری صحت کے سربراہ ٹیڈروس ادھانوم غیبریسس جو کورونا ویکسین کی دنیا بھر میں منصفانہ تقسیم کا مطالبہ کرتے ہیں نے بتایا کہ مالدار ممالک میں ہر 4 میں سے ایک فرد کے لیے کورونا ویکسین مل گئی ہے جب کہ غریب ممالک میں ہر 500 میں سے صرف ایک فرد کے لیے ویکسین ملی ہے۔
سربراہ عالمی ادارہ صحت نے مزید کہا کہ ہمیں امید تھی کہ اس سال مارچ کے آخر تک کورونا ویکسین کی 10 کروڑ خوراکیں غریب ممالک کو موصول ہوجائیں گی لیکن اب تک صرف 3 کروڑ 80 لاکھ خوراکیں فراہم کی جاسکی ہیں۔
واضح رہے کہ ڈبلیو ایچ او غریب ممالک کو کورونا ویکسین کی فراہمی کے پروگرام ’’کوویکس اسکیم‘‘ کی بھی نگرانی کر رہی ہے اور 92 غریب ممالک تک کورونا ویکسین کی رسائی کو یقینی بنانے کے لیے کام کر رہی ہے۔
