SAHAR

عراقی کردستان کے حکام نے کرد پیشمرگہ فورس کے اہلکاروں پر دہشت گرد گروہ داعش کے حملے میں کیمیاوی ہتھیار استعمال کئے جانے کا امکان ظاہر کیا ہے۔

عراق کے علاقے کردستان کی سیکورٹی کونسل نے بدھ کے دن ایک بیان جاری کیا جس میں کہا گیا ہے کہ موصل ڈیم کے قریب کرد فورس کے اہلکاروں کے ٹھکانے پر راکٹ کے حملے کے بعد زرد رنگ کے دھویں کا مشاہدہ کیا گیا۔ بیان میں خدشہ ظاہر کیا گیا ہے کہ یہ دھواں کیمیائی مادے کا ہوسکتا ہے۔ اس حملے میں کرد فورس کا ایک اہلکار زخمی ہوا ہے جسے ہسپتال میں داخل کرا دیا گیا ہے۔ اس سے قبل بھی داعش نے ایک حملے میں کلورین گیس استعمال کی تھی۔

کیمیاوی ہتھیاروں پر پابندی سے متعلق تنظیم نے دہشت گرد گروہ داعش کے ہاتھوں کیمیاوی ہتھیار استعمال کئے جانے پر تشویش کا اظہار کیا ہے۔

 واضح رہے کہ شام اور عراق کی حکومتوں اور عوام کے خلاف لڑنے والے دہشت گرد گروہ داعش کے عناصر نے ان دو مسلمان ہمسایہ ممالک میں بدترین جنگی جرائم کا ارتکاب کیا ہے۔ دہشت گرد گروہ داعش نے منگل کے دن شمالی شام میں واقع مارع شہر پر بھی کیمیاوی ہتھیاروں سے حملہ کیاتھا۔ اس حملے میں چار افراد اپنی جانوں سے ہاتھ دھو بیٹھے جبکہ متعدد زخمی ہوگئے۔