امریکی صدر ٹرمپ اب مواخذے سے بچ نہیں سکتے
امریکی صدر ٹرمپ کے خلاف مواخذے کی کارروائی کی سماعت کرنے والی جوڈیشری کمیٹی نے صدر ٹرمپ کے مواخذے کی منظوری دے دی۔
بین الاقوامی خبر رساں ادارے کے مطابق پارلیمانی جوڈیشری کمیٹی نے پے در پے سماعت کے بعد صدر ٹرمپ کے دو آرٹیکل کے تحت مواخذے کی منظوری دے دی جس کے بعد مواخذے کی قرار داد بدھ کو ایوان نمائندگان میں پیش کی جائے گی اور باضابطہ کارروائی کا آغاز ہوجائے گا۔
دوسری جانب وائٹ ہاؤس سے جاری بیان میں جوڈیشری کمیٹی کے فیصلے پر شدید تنقید کرتے ہوئے کہا گیا ہے کہ صدر ٹرمپ کو سینیٹ سے شفاف انصاف کی امید ہے جو قانون کے تقاضوں کو پورا کرے گی۔ قبل ازیں ٹرمپ نے جوڈیشری کمیٹی پر عدم اعتماد کا اظہار کرتے ہوئے سماعت میں حاضر ہونے سے انکار کردیا تھا۔
ٹرمپ پر ایک سیکیورٹی اہلکار نے الزام عائد کیا تھا کہ انہوں نے یوکرینی صدر ولودیمیر زیلنسکی پر ڈیمو کریٹک پارٹی کے رہنما جو بائیڈن کو قانون کے شکنجے میں لانے کیلیے دباؤ ڈالا تھا۔ اگر ایوان نمائندگان سے قرارداد منظور ہوجاتی ہے تو بل کلنٹن اور اینڈریو جانسن کے بعد ٹرمپ امریکا کے تیسرے صدر ہوں گے جن کا مواخذہ کیا گیا ہو۔
