ہندوستان ؛ جموں کشمیر کے وزیر اعلی کا راہل گاندھی کی حمایت کا اعلان

Feb ۲۴, ۲۰۲۶ ۱۹:۰۴ Asia/Tehran

ہندوستان کے زیر انتظام جموں کشمیر کے وزیراعلیٰ عمر عبداللہ نے قائد حزب اختلاف کانگریس لیڈر راہل گاندھی کی حمایت کا اعلان کرتے ہوئے کہا کہ انہوں نے بطور قائد حزبِ اختلاف اپنے تمام فرائض بھرپور طریقے سے انجام دیئے ہیں۔

سحرنیوز/ہندوستان: رپورٹ کے مطابق گل مرگ میں منعقدہ کھیلو انڈیا ونٹر گیمز کی افتتاحی تقریب کے موقع پر صحافیوں سے گفتگو کرتے ہوئے انڈیا اتحاد کے ایک اہم رکن اور جموں کشمیر کے وزیراعلیٰ عمر عبداللہ نے کہا کہ قیادت کی تبدیلی کے حوالے سے جو دعوے میڈیا میں گردش کر رہے ہیں وہ پوری طرح سے بےبنیاد ہیں کیونکہ انڈیا بلاک کی کسی بھی میٹنگ میں ایسا کوئی بھی موضوع زیرِ بحث نہیں آیا۔ نیشنل کانفرنس کے لیڈر عمر عبداللہ نے دو ٹوک الفاظ میں کانگریس لیڈر راہل گاندھی کی بھرپور حمایت کا اعلان کرتے ہوئے کہا کہ انہوں نے بطور قائد حزبِ اختلاف اپنے تمام فرائض بہترین طریقے سے انجام دیئے ہیں۔

ہمیں فالو کریں:

جموں کشمیر کے وزیراعلی عمر عبداللہ سے سوال کیا گیا کہ کیا اتحاد کے کچھ حلقے ممتا بنرجی کو اتحاد کی سربراہی کےلئے آگے بڑھا رہے ہیں؟ توانہوں نے جواب میں کہا کہ ایسی کوئی بات نہ کسی اجلاس میں ہوئی ہے اور نہ ہی اس حوالے سے کوئی باضابطہ تجویز سامنے آئی ہے۔ انہوں نے دوٹوک الفاظ میں واضح کیا کہ قیادت سے متعلق فیصلہ صرف اور صرف انڈیا اتحاد کے اجتماعی اتفاق ہی سے ہو گا اس میں قیاس آرائیوں کا کوئی دخل نہیں ہوگا۔