ایران کی دفاعی سرگرمیاں صرف ملک کے دفاع کے لئے ہیں: صدر مملکت ڈاکٹر حسن روحانی
اسلامی جمہوریہ ایران کے صدر نے کہا ہے کہ ایران کی دفاعی سرگرمیاں صرف ملک کے دفاع کے لئے ہیں۔
صدر مملکت ڈاکٹر حسن روحانی نے کہا ہمیں اس بات پر خوشی ہے کہ انتہا پسندوں، جنگ پسندوں اور ان لوگوں کو خالی ہاتھ لوٹنا پڑا جنھوں نے بلاوجہ ایران کے میزائلی پروگرام کے معاملے کو سلامتی کونسل میں اٹھانے کی کوشش کی تھی۔
صدر مملکت ڈاکٹر حسن روحانی نے بدھ کو کابینہ کے اجلاس کے بعد نامہ نگاروں سے گفتگو کرتے ہوئے کہا کہ دنیا نے انتہا پسندوں اور جنگ پسندوں کو منفی جواب دیا ہے - صدر ڈاکٹر روحانی نے کہا کہ ایران کی دفاعی سرگرمیاں صرف ملک کے دفاع کے لئے ہیں -
انہوں نے کہا کہ ایران نے کبھی بھی کسی ملک خاص طور پر اپنے ہمسایہ ملکوں کے خلاف جارحانہ عزائم نہیں رکھے اور نہ رکھتا ہے -
صدر مملکت ڈاکٹر روحانی نے زور دے کر کہا کہ ایران کی دفاعی توانائیاں صرف ملک کے دفاع کے لئے ہیں -
انہوں نے اس بات کا ذکر کرتے ہوئے، کہ ایران کے عوام کشیدگی اور انتہا پسندی کو سخت ناپسند کرتے ہیں، اس امید کا اظہار کیا کہ ایرانی عوام کی مدد سے علاقے میں بھی امن و استحکام برقرار ہوجائے گا۔
صدر مملکت ڈاکٹر حسن روحانی نے کہا کہ ہم امید کرتے ہیں کہ علاقے کے ایک دو ممالک جنھوں نے اعتدال پسندی سے ہٹ کرتشدد کا راستہ اختیار کرلیا ہے وہ دوبارہ صحیح راستے پر لوٹ آئیں گے -
