وزیر خارجہ جواد ظریف نے برسلز کے دھماکوں کی مذمت کی
اسلامی جمہوریہ ایران کے وزیر خارجہ نے بلجیم کے وزیرخارجہ کے ساتھ ٹیلیفونی گفتگو میں دارالحکومت برسلز میں ہونے والے دھماکوں کی مذمت کی-
ارنا کی رپورٹ کے مطابق محمد جواد ظریف نے بلجیم کے وزیر خارجہ دیدیہ ریندرز کے ساتھ ٹیلیفونی گفتگو میں، بلجیم کے عوام اور اس دہشت گردانہ کارروائی کی بھینٹ چڑھنے والوں کے اہل خانہ کے ساتھ اظہار ہمدردی کیا-
جواد ظریف نے کہا کہ دہشت گردی اور انتہاپسندی ایک عالمی مسئلہ ہے اور اس سے مقابلے کے لئے عالمی سطح پر اقدام کی ضرورت ہے-
واضح رہے کہ منگل کے روز برسلز میں ہونے والے دہشت گردانہ حملوں میں چونتیس افراد ہلاک اور ایک سو اٹھانوے زخمی ہوگئے - اس سے قبل صدر مملکت ڈاکٹر حسن روحانی نے بھی اپنے ایک ٹوئیٹ میں برسلز میں رونما ہونے والے دہشت گردانہ واقعات کی مذمت کرتے ہوئے بیلجیئم کے عوام اور حکومت کو تعزیت پیش کی ہے۔
ڈاکٹر حسن روحانی نے کہا ہے کہ انہیں دہشت گردی کے ان واقعات میں قیمتی انسانی جانوں کے ضیاع پر شدید صدمہ پہنچا ہے۔ انہوں نے تحریر کیا کہ ایران کی حکومت اور عوام، بلجیئم کی حکومت اور عوام، خاص طور سے مرنے والوں کے لواحقین کو تعزیت پیش کرتے ہیں۔ اس سے پہلے ایران کی وزارت خارجہ کے ترجمان نے بھی برسلز میں ہونے والے دہشت گردانہ حملوں کی شدید الفاظ میں مذمت کرتے ہوئے مرنے والوں کے لواحقین سے ہمدردی کا اظہار کیا تھا۔
