ایران کے جدید ترین کروز میزائل کا تجربہ
وزیر دفاع حسین دہقان نے کہا ہےکہ بحریہ کی مشقوں کے دوران ایران کے جدید ترین بحری کروز میزائل نصیر کا کامیاب تجربہ کیا گیا۔
اسلامی جمہوریہ ایران کے وزیر دفاع حسین دہقان نے پیر کے روز کہا کہ ولایت پچانوے بحری مشقوں کے دوران، جو ایران کے جنوب میں سمندری علاقوں میں جاری ہیں، نصیر نامی جدید ترین بحری کروز میزائل کا کامیاب تجربہ کیا گیا-
ان کا کہنا تھا کہ مشقوں کے دوران فائر کیا گیا یہ میزائل اپنے ہدف پر جا کر لگا-
ولایت پچانوے نامی ایرانی بحریہ کی فوجی مشقیں اتوار کی صبح آبنائے ہرمز، بحیرہ عمان ، شمالی بحر ہند اور آبنائے باب المندب کے دو ملین کلومیٹر مربع علاقوں میں شروع ہوئیں-
ایرانی بحریہ کے کمانڈرحبیب اللہ سیاری نے کہا ہے کہ ان مشقوں کا مقصد علاقے میں امن و سیکورٹی کا قیام، بحری قزاقوں اور دہشت گردوں کا مقابلہ کرنا اور علاقے کے ملکوں کو امن و صلح کا پیغام دینا ہے-
