متعدد دہشت گردوں کی گرفتاریاں
ایران کے سیکورٹی اور انٹیلی جینس اداروں نے پچھلے چند روز کے دوران عوامی احتجاج کو تشدد میں تبدیل کرنے والے متعدد دہشت گردوں اور انقلاب مخالف عناصر کو گرفتار کرلیا ہے۔
ایران کی وزارت انٹیلی جینس کی ویب سائٹ کے مطابق انٹیلی جینس کے اہلکاروں نے عوام کی جانب سے فراہم کردہ معلومات اور اینٹیلی جینس کے ذریعے ملنے والی اطلاعات کی بنیاد پر، حالیہ ہنگاموں اور بلوؤں کے درمیان عام لوگوں اور پولیس اہلکاروں پر حملے اور انہیں قتل کرنے، نجی املاک کو نقصان پہنچانے اور امن و امان کو درھم برھم کرنے والوں کو گرفتار کرلیا ہے۔
ایران کی انٹیلی جینس نے تخریب کاری کی غرض سے ملک کی مغربی سرحدوں سے ایران میں داخل ہونے والی دہشت گردوں کی ایک ٹیم کا پتہ لگانے کے بعد جنوب مغربی ایران کے شہر سردشت میں اس کا قلع قمع کردیا ہے۔ دہشت گردوں کی کمین گاہ سے تین بندوقیں اور دیگر فوجی آلات اور نقشے بھی برآمد ہوئے ہیں۔
ایران کے انٹیلی جینس اداروں نے ایک اور کارروائی کے دوران جنوب مغربی شہر ایذہ میں بھی بلوے کی منصوبہ بندی کرنے والے انقلاب مخالفین کے ایک نیٹ ورک کو تہس نہس اور اس کے کئی ارکان کو گرفتار کرلیا ہے۔ یہ لوگ یورپ کے بعض ملکوں میں مقیم انقلاب دشمن عناصر کے ساتھ رابطے میں تھے اور ان کی فراہم کردہ معلومات کے ذریعے دھماکہ خیز مواد تیار کر رہے تھے۔
