SAHAR

اسلامی جمہوریہ ایران کے وزیر دفاع بریگیڈیئر جنرل امیر حاتمی نے اپنے جاپانی ہم منصب تاروکونو سے ٹیلیفون پر گفتگو کرتے ہوئے کہا کہ امریکا کی دہشت گرد فوج نے ایک ایسے وقت ایران کے جنرل قاسم سلیمانی کے کاررواں پر فضائی حملہ کرکے انہیں شہید کیا جب وہ عراق کے سرکاری دورے پر بغداد گئے تھے۔

ایران کے وزیر دفاع نے کہا کہ یہ ایسا دہشت گردانہ اقدام ہے جس کی ماضی میں کوئی مثال نہیں ملتی کہ کسی ملک کی فوج نے کسی تیسرے ملک میں کسی ملک کے اعلی عہدیدار کو اس طرح دہشت گردی کا نشانہ بنایا ہو۔ 

انھوں نے کہا کہ یہ ریاستی دہشت گردی کی نمایاں ترین مثال ہے۔ انھوں نے کہا کہ دنیا کے سبھی آزاد اور خود مختار ملکوں کو امریکا کی اس ریاستی فوجی دہشت گردی کی کھل کے مذمت کرنا چاہئے۔

انھوں نے کہ کہ مغربی ایشیا میں امریکا کی دہشت گرد فوج کی موجودگی کشیدگی اور عدم استحکام کا باعث ہے۔ ان کا کہنا تھا کہ کشیدگی کو ختم کرنے اور ثبات و استحکام کے قیام کے لئے اس خطے سے دہشت گرد امریکی فوج کا انخلا ضروری ہے۔ 

جاپان کے وزیر دفاع تارو کونو نے بھی اس ٹیلیفونی گفتگو میں کہا کہ ان کاملک مغربی ایشیا میں کشیدگی ختم کرانے اور امن و استحکام کے قیام میں تعاون کے لئے تیار ہے۔انھوں نے اسی کے ساتھ کہا کہ ان کے ملک نے علاقے میں امریکا کی قیادت میں فوجی اتحاد میں شامل نہ ہونے کا فیصلہ کیا ہے۔