SAHAR

ایران کی قومی فٹبال ٹیم کے ہیڈ کوچ کارلس کیروش نے کہا ہے کہ ورلڈ کپ کے اگلے مرحلے میں جانے کا خواب شرمندہ تعبیر نہ ہوسکا۔

سحر نیوز/ ایران: ایران اور امریکہ کے میچ کے بعد ہونے والی پریس کانفرنس میں صحافیوں کے سوالات کا جواب دیتے ہوئے کارلس کیروش نے کہا کہ اس بات میں کوئی شک نہیں ہے کہ ہمارے کھلاڑیوں نے بھرپور محنت کی اور ایران کی ٹیم اگلے مرحلے میں جانے کی حقدار بھی تھی ۔

انہوں نے کہا کہ ہمارے کھلاڑیوں نے بہت محنت کی ۔ دوسرے ہاف میں بہت بہتر کھیل بھی پیش کیا اور گول کرنے کے کئی مواقع بھی حاصل کئے لیکن فٹبال میں جو گول کرتا ہے وہی کامیاب ہوتا ہے۔ کارلس کیروش نے کہا کہ اس بار ہمارا خواب شرمندہ تعبیر نہ ہوسکا لیکن اگلی بار ہم بہتر تیاری کے ساتھ لوٹیں گے، کھیلوں پر توجہ مرکوز رکھیں گے اور دنیا بھر میں ایران کا نام روشن کریں گے۔