ایرانی عوام کی پولنگ اسٹیشنوں میں بڑے پیمانے پر موجودگی، ووٹنگ کی مدت رات 10 بجے تک بڑھا دی گئی
پورے ایران میں چودھویں صدارتی انتخابات کے لئے آج صبح 8 بجے ووٹنگ شروع ہوئی اور اب تک ووٹنگ کی مدت 4 گھنٹے کیلئے بڑھادی گئی ہے ۔
سحر نیوز/ ایران: پولنگ مراکز پر عوام کے جوش و خروش اور عوام کی پولنگ اسٹیشنوں میں بڑے پیمانے پر موجودگی کے پیش نظر ایران کی وزارت داخلہ میں انتخاباتی کمیشن کے ترجمان محسن اسلامی نے ووٹنگ کی مدت رات 10 بجے تک بڑھا دی ۔
پورے ایران میں چودھویں صدارتی انتخابات کے لئے آج صبح 8 بجے ووٹنگ شروع ہوئی جو پہلے شام 6 بجے تک جاری رہی پھر اس میں 2 گھنٹے کا اضافہ کر کے ٹائم رات 8 بجے تک کر دیا گیا تاہم اب ایک مرتبہ پھر ووٹنگ کی مدت مزید 2 گھنٹے تک بڑھا دی اوراس طرح رات 10 بجے تک ایرانی عوام ووٹ ڈال سکیں گے۔
قابل ذکر ہے کہ مسعود پزشکیان، مصطفیٰ پور محمدی، سعید جلیلی اور محمد باقر قالیباف چودھویں صدارتی انتخابات کے امیدوار ہیں۔
ایران کے آئین کی نگراں کونسل کے ترجمان نے کہا ہے کہ ایران کے چودھویں صدارتی انتخابات کی ووٹنگ اندرون ملک انسٹھ ہزار شعبوں اور بیرون ایران پچانوے ملکوں میں ہوگی۔ انتخابات کی کوریج کے لیے دنیا بھر سے ذرائع ابلاغ کے نمائندے ایران آئے ہوئے ہیں۔
