دوا سازی کے شعبے میں ایران کی اہم کامیابی؛ تین جدید پروڈکشن یونٹوں کا افتتاح
ایران میں دوا سازی کے شعبے میں تین جدید پروڈکشن یونٹوں کا باقاعدہ افتتاح کر دیا گیا ہے۔
سحرنیوز/ایران: اسلامی جمہوریہ ایران نے دوا سازی کے شعبے میں مزید پیشرفت جاری رکھتے ہوئے تین جدید پروڈکشن یونٹس کی تعمیر مکمل کرلی ہے جس سے برآمدات میں ایک سو پچاس فیصد اضافہ متوقع ہے۔ رپورٹ کے مطابق ان جدید یونٹوں کی بدولت ایران سیفالوسپورینز، دوا کی کوٹنگ اور کیپسول سازی کے میدان میں خودکفیل ہو جائے گا۔
ایران کے نائب وزیر صحت کے مطابق ان پروڈکشن یونٹس کے فعال ہونے سے ایران کو سالانہ پچیس لاکھ ڈالر کی ادویات کی درآمدات سے نجات ملے گی اور دوا سازی کے شعبے میں نئی ملازمتوں کے مواقع پیدا ہوں گے۔
انہوں نے مزید کہا کہ گزشتہ سال کے دوران ایران کی ادویات کی برآمدات میں ایک سو پچاس فیصد اضافہ دیکھنے کو ملا ہے، جو اس بات کا غماز ہے کہ ایران عالمی مارکیٹ میں دوا سازی کی صنعت میں اپنا حصہ بڑھانے کی بھرپور کوشش کر رہا ہے۔ذرائع کے مطابق ایران نے آئندہ تین ماہ میں بایوٹیکنالوجی سے متعلق نئی ادویات کی تیاری کا بھی اعلان کیا ہے، جن میں انسولین انجیکشن کی مقامی طور پر تیاری شامل ہے، جو ایران کے لیے ایک اور بڑا سنگ میل ثابت ہو گا۔
