SAHAR

شام کی قانونی حکومت کے مخالف گروہ کے سربراہ ریاض نعسان نے کہا ہے کہ وہ جنیوا مذاکرات میں شرکت کے لئے تیار ہیں

شام کی قانونی حکومت کے مخالف گروہ کے لیڈر ریاض نعسان نے کہا ہے کہ ہم جلد سے جلد جنیوا مذاکرات شروع کئے جانے کے حق میں ہیں اور مذاکرات میں شرکت کرنے والے افراد جمعے تک جنیوا پہنچ جائیں گے -

واضح رہے کہ تیرہ مارچ سے ہونے والے جنیوا مذاکرات میں شرکت کے لئے مخالف گروہ نے ایک ایسے وقت اپنی آمادگی کا اعلان کیا ہے کہ جب شام میں گذشتہ ستائیس فروری سے جنگ بندی جاری ہے -

اس درمیان روسی وزارت دفاع نے اعلان کیا ہے کہ تقریبا تیس شامی گروہوں نے اس جنگ بندی پر اتفاق کیاہے جبکہ چھے مزید گروہ اس جنگ بندی میں شامل ہونے کی غرض سے مذاکرات کر رہے ہیں -

شام کے امور میں اقوام متحدہ کے خصوصی نمائندے اسٹیفن ڈی میستورا نے کہا ہے کہ شام سے متعلق امن مذاکرات اسی ہفتے حنیوا میں ہوں گے -

دوسری جانب شام میں جنگ بندی کے ساتھ ساتھ مختلف علاقوں میں انسان دوستانہ امداد کی ترسیل کا کام بھی جاری ہے - روسی وزارت دفاع نے کہا ہے کہ شام کے مختلف علاقوں میں انسان دوستانہ امداد کی ترسیل میں سہولت فراہم کرنے کے لئے وہ شام میں اپنا فوجی اڈہ فراہم کرنے کے لئے تیار ہے -

روس کی وزارت دفاع کے ترجمان نے کہا ہے کہ طرطوس میں روسی فوجی اڈے میں امدادی پیکٹوں کو جمع کیا جاسکتا ہے اور اس کے علاوہ اگرغیرملکی طیارے امدادی اشیا لے کر شام میں اترنا چاہتے ہیں تو ان کے لئے لاذقیہ میں روسی فضائی چھا ؤنی کی خدمات فراہم کی جائیں گی -