بنگلہ دیش: مغویوں کی رہائی کے لیے آپریشن مکمل، تمام دہشت گرد ہلاک
Jul ۰۲, ۲۰۱۶ ۱۱:۱۵ Asia/Tehran
بنگلا دیش کے دارالحکومت میں مغویوں کی بازیابی کے لئے شروع کیا جانے والا آپریشن مکمل کر لیا گیا ہے جبکہ سفارتی علاقے میں واقع غیر ملکی ریسٹورنٹ پر حملہ کرنے والے تمام دہشت گردوں کو ہلاک کر کے ہوٹل کو کلیئر قرار دے دیا گیا ہے۔
موصولہ رپورٹ کے مطابق بنگلہ دیش آرمی کے کمانڈوز نے آپریشن کر کے ڈھاکا کے سفارتی علاقے میں واقع غیر ملکی ریسٹورنٹ سے مغویوں کو بازیاب کرا کے علاقے کو کلیئر قرار دے دیا ہے۔
بنگلادیشی فوج کے لیفٹیننٹ کرنل مسعود نے بتایا کہ آپریشن کے دوران 6 دہشت گرد ہلاک ہوئے جب کہ 3 غیر ملکیوں سمیت 13 شہریوں کو بازیاب کرایا گیا، بازیاب کرائے گئے غیر ملکیوں میں جاپانی، ہندوستانی اور ارجنٹائن کے شہری شامل ہیں، ہلاک ہونے والے دہشت گردوں کی لاشوں کو قبضے میں لے کر تحقیقات کا آغاز کر دیا گیا ہے۔
