مناسک حج کا آغاز ہو گیا۔ ویڈیو
سرزمین حجاز میں حج کا آغاز ہو گیا ہے جس کے بعد فرزندان اسلام نے با ضابطہ طور پر مناسک حج کی انجام دہی شروع کر دی ہے۔ ویڈیو میں حجاج کرام کو خانۂ کعبہ کا طواف کرتے ہوئے دیکھا جا سکتا ہے۔
سعودی حکام نے آج ہفتے کے روز اعلان کیا ہے کہ کورونا پروٹوکول کے ساتھ مناسک حج کی انجام دہی کا آغاز کر دیا گیا ہے۔ فرزندان اسلام آج حج تمتع کی انجام دہی کے لئے مکہ مکرمہ میں وارد ہوئے ہیں جو کل اتوار کے روز میدان عرفات کا رخ کریں گے۔
غیر ملکی ذرائع کے مطابق اس سال بھی گزشتہ برس کی مانند صرف وہی افراد حج کی سعادت حاصل کر پائے ہیں جو سعودی عرب میں موجود تھے۔ اسکے علاوہ اس بار حاجیوں کے لئے کورونا ویکسین کی شرط بھی لگا دی گئی تھی جس کے تحت سعودی حکام نے صرف ان افراد کو اجازت دی ہے جنہوں نے کورونا ویکسین کی دونوں ڈوز لے لی ہیں۔
اس بار سعودی حکام نے کل ۶۰ ہزار افراد کو حج بجا لانے کی اجازت دی ہے جنہیں پانچ لاکھ ۵۸ ہزار خواہشمند افراد کے درمیان سے انتخاب کیا گیا ہے۔
اب سے دو سال قبل یعنی دوہزار انیس میں حاجیوں کی تعداد پچیس لاکھ کے قریب تھی۔
