عرب ملکوں کے وزرائے خارجہ کو شام کا پیغام
شام کے وزیر خارجہ نے اعلان کیا ہے کہ تعلقات کو بہتر بنانے کے لئے دمشق نے بیشتر عرب ملکوں کو اپنا پیغام ارسال کیا ہے۔
شام کی سرکاری خبررساں ایجنسی سانا کی رپورٹ کے مطابق شام کے وزیر خارجہ فیصل مقداد نے منگل کے روز ایک بیان میں کہا ہے کہ شام میں اس وقت چودہ عرب سفارت خانے موجود ہیں۔
انھوں نے کہا کہ حالیہ دنوں کے دوران بیشتر عرب ملکوں کے وزرائے خارجہ کو پیغامات ارسال کئے گئے ہیں جن میں کہا گیا ہے کہ ہم سب نے ہی نقصان اٹھایا ہے جیساکہ عرب ممالک روز بروز اغیار کے مراکز میں تبدیل ہوتے جا رہے ہیں جبکہ عرب ملکوں کے معاشی حالات بھی اچھے نہیں ہیں اس لئے ہمیں چاہئے کہ عرب قوم ہونے کی حیثیت سے ایک دوسرے کے لئے اپنی آغوش پھیلائیں۔
فیصل مقداد نے تمام عرب ملکوں کی شمولیت سے اجلاس کے انعقاد کے لئے آمادگی کا اعلان کرتے ہوئے عرب لیگ میں شام کی واپسی کا ذکر کیا اور کہا کہ عرب لیگ ایک ایسا ادارہ ہے جس میں اختلاف و اتفاق رائے ہوتا ہے ۔ انھوں نے کہا کہ ہم عرب لیگ میں شام کی واپسی کے لئے کوئی شرط نہیں رکھتے اس لئے کسی کو بھی ہم پر کوئی شرط نہیں لگانی چاہئے۔
شام کے وزیر خارجہ نے کہا کہ اس وقت عرب لیگ میں شام کی واپسی کے سلسلے میں رابطے جاری ہیں تاہم شام عزت کے ساتھ شامل ہونا چاہتا ہے اور سب کو چاہئے کہ شام کے وقار کا دفاع کرے اور اس سلسلے میں ہم پرامید بھی ہیں۔
فیصل مقداد نے اسی طرح روس اور ایران کے ساتھ شام کے تعلقات کو بہت زیادہ خوشگوار قرار دیا اور کہا کہ دمشق دہشت گردوں کے خلاف جنگ میں ماسکو اور تہران کی حمایت کا قدرداں ہے۔
