صیہونی فوج نے دو فلسطینیوں پر گاڑی چڑھا کر زخمی کردیا
غاصب صیہونی فوج نے مغربی کنارے پر حملہ کے دوران طولکرم میں دو فلسطینیوں کو گاڑی کے نیچے کچل کر زخمی کر دیا جبکہ ایک صیہونی آبادکار کو غاصب فوج نے فائرنگ کرکے زخمی کر دیا ہے-
سحرنیوز/دنیا: تسنیم نیوز نے شھاب نیوز کے حوالے سے لکھا ہے کہ صیہونی فوج نے طولکرم شھر اور پناہ گزین کیمپ پر حملے کے دوران دو فلسطینیوں کو گاڑی کے نیچے کچل کر زخمی کر دیا ہے۔رپورٹ کے مطابق طولکرم پر حملے کے دوران فلسطینی مزاحمتی جوانوں نے صیہونیوں کا مقابلہ کیا۔ فلسطینی صفا نیوز نے طولکرم میں صیہونی فوجی اور مزاحمتی فورسز کے درمیان شدید جھڑپ کی اطلاع دیتے ہوئے لکھا ہے کہ صیہونی اسنائپر علاقے کے بلند مقامات پر تعینات ہیں۔ صیہونی فوج نے معالیہ لفونا کے علاقے میں ایک غاصب آبادکار کے صیہونی فوج کے ہاتھوں فائرنگ سے زخمی ہونے کی بھی خبر دی ہے۔ رپورٹ کے مطابق صیہونی فوج نے اس صیہونی آبادکار کو فلسطینی سمجھ کر گرفتار کرنے کی کوشش کی اور اس کی مزاحمت پر اسے گولی مار دی۔ یاد رہے کہ گزشتہ روز حوارہ کے کارواش مرکز میں فائرنگ کے واقعے میں دو صیہونی مارے گئے تھے اور حملہ آور وہاں سے فرار ہونے میں کامیاب ہو گیا تھا۔
