امریکہ نہ صرف غزہ بلکہ خطے کی تمام جنگوں کا ذمہ دار ہے: اسامہ بن حمدان
حماس کے خارجہ تعلقات کے سربراہ اسامہ بن حمدان نے کہا ہے کہ امریکہ نہ صرف غزہ بلکہ خطے کی تمام جنگوں کا ذمہ دار ہے۔
سحرنیوز/ عالم اسلام : اسامہ بن حمدان نے المنار کے ساتھ گفتگو میں کہا کہ صیہونی حکومت کا علاقے میں کوئی مستقبل نہیں ہے- انہوں نے اس بات کا ذکر کرتے ہوئے کہ مزاحمتی محاذ نے ایک عظیم کارنامہ انجام دیا ہے کہا کہ فلسطین کی آزادی کا عمل طوفان الاقصی آپریشن سے شروع ہوچکا ہے اور مزاحمت کے منصوبے کے بارے میں کوئی سودے بازی نہیں ہوگی۔
حماس کے اس عہدیدارنے کہا ہے کہ اس جنگ کے بعد فلسطینیوں کو یہ حق حاصل ہے کہ ایسے رہنماؤں کا انتخاب کریں جو فلسطینی گروہوں کی پیشرفت اور مزاحمت کا باعث بنیں-حمدان نے یہ بیان ایسے میں دیا ہے کہ اسرائیل کے لئے امریکہ کی ہمہ جانبہ حمایت جاری ہے-
اس حوالے سے صہیونی ویب سائیٹ YNET نے گذشتہ سال ستائیس دسمبر کو ایک رپورٹ شائع کی تھی جس میں کہا تھا کہ غزہ کے خلاف جنگ کے آغاز سے لے کر اب تک تل ابیب کو دی جانے والی امریکی فوجی امداد ، 1973 کی جنگ کے بعد سے بلند ترین سطح پر پہنچ گئی ہے۔
