SAHAR

ڈاکٹروں کی عالمی تنظیم نے شمالی شام میں داعش کے ہاتھوں کیمیاوی ہتھیاروں کے استعمال کی خبردی ہے

ڈاکٹروں کی عالمی تنظیم نے ایک بیان میں اعلان کیا ہے کہ حلب میں دہشت گرد گروہ داعش کے حملوں کا نشانہ بنے ایک خاندان کا علاج کرنے والے ڈاکٹروں سے حاصل شدہ دستاویزات شام میں دہشت گردوں کے ہاتھوں کیمیاوی ہتھیاروں کے استعمال کو ثابت کرتے ہیں-

 شام کے ڈاکٹروں کی تنظیم نے بھی مارع نامی علاقے میں کیمیاوی مواد سے متاثر ہونے والے پچاس عام شہریوں کے علاج کی طرف اشارہ کرتے ہوئے کہا ہے کہ ان کے پاس علاج کے لئے آنے والے تقریبا" تیس افراد جلد کے ایسے امراض میں مبتلا تھے جس سے مسٹرڈ گیس کے استعمال کی نشاندہی ہوتی ہے-

ڈاکٹروں کی عالمی تنظیم کے پروگرام انچارج پیبلو مارکو نے بھی کہا ہے کہ صوبہ حلب میں وقت گزرنے کے ساتھ ساتھ مریضوں میں جوعلامات ظاہر ہو رہی ہیں وہ اس صوبے میں کیمیاوی حملے کو ثابت کرتی ہیں-

قابل ذکر ہے کہ داعش گروہ نے شام میں کیمیاوی ہتھیاروں اور زہریلی گیس کا بارہا استعمال کیا ہے-
کیمیاوی ہتھیاروں کے استعمال اور ان کے پھیلاؤ پر پابندی کی تنظیم نے بھی عراقی کردوں کے خلاف داعش کی طرف سے کیمیاوی ہتھیاروں کے استعمال پر تشویش کا اظہار کیا ہے اور کہا ہے کہ اس کے پاس اس بارے میں ثبوت و شواہد موجود ہیں جن کی وہ تحقیق کرے گی-az26082015