امریکہ اور پاکستان کے راستے جدا
امریکہ اور پاکستان کے مابین سرد جنگ بالاخر دونوں ممالک کے راستوں کے جدا ہونے پر منتج ہوئی ۔
امریکی جریدے وال اسٹریٹ جرنل کو انٹرویو دیتے ہوئے پاکستان کے وزیرخارجہ خواجہ آصف کا کہنا ہے کہ امریکی سکیورٹی امداد کی معطلی کے بعد امریکا سے اتحاد ختم سمجھتا ہوں جب کہ پاکستان تنہا نہیں بلکہ ہمارے پاس دوسرے اتحادیوں کے آپشن موجود ہیں۔
خواجہ آصف کا کہنا تھا کہ امریکا کا پاکستان کے ساتھ رویہ اتحادیوں والا نہیں، اتحادی ایسا سلوک نہیں کرتے اور امریکی سیکیورٹی امداد کی معطلی کے بعد امریکا سے اتحاد ختم سمجھتا ہوں، اب امریکا کے ساتھ ہمارا کوئی اتحاد نہیں جب کہ پاکستان تنہا نہیں، ہمارے پاس دوسرے اتحادیوں کے آپشن موجود ہیں۔
پاکستان کےوزیرخارجہ کا کہنا تھا کہ پاکستان اور امریکا کے درمیان تعلق ستمبر 2001 سے قائم تھا لیکن ہم نے امریکا کی افغانستان مہم میں شامل ہو کر بہت بڑی غلطی کی، امریکی مہم میں شامل ہونے سے پاکستان میں دہشت گردی نے جنم لیا۔ انہوں نے کہا کہ امریکا نے دہشت گردی کے خلاف جنگ میں پاکستان کی قربانیوں کا اعتراف نہیں کیا اور اب امریکا اپنی شکست کا ملبہ پاکستان پر ڈال رہا ہے ۔
