کراچی میں 4 منزلہ عمارت میں دھماکہ، 20 جاں بحق و زخمی
ریسکیو ذرائع کا کہنا ہے کہ دھماکے کا شکار ہوئی رہائشی عمارت 4 منزلہ تھی اور اس کے گراؤنڈ فلور پر ایک نجی بینک بھی واقع تھا۔
پاکستان کے تجارتی شہر کراچی کے علاقے گلشن اقبال میں مسکن چورنگی کے قریب آج صبح 4 منزلہ عمارت میں دھماکہ ہوا ہے جس میں اب تک 4 افراد جاں بحق اور 16 زخمی ہوئے کہ جن میں سے 7 کی حالت تشویشناک بتائی جا رہی ہے۔
عینی شاہدین کے مطابق دھماکہ شدید نوعیت کا تھا جس کے باعث اطراف کی عمارتوں کے شیشے ٹوٹ گئے، گاڑیوں اور موٹر سائیکلوں کو شدید نقصان پہنچا ہے۔
ریسکیو ذرائع کا کہنا ہے کہ دھماکے کا شکار ہوئی رہائشی عمارت 4 منزلہ تھی اور اس کے گراؤنڈ فلور پر ایک نجی بینک بھی واقع تھا۔
دھماکے کے فوری بعد پولیس اور رینجرز نے جائے وقوع پر پہنچ کر علاقے کی ناکہ بندی کردی ہے جبکہ ریسکیو ٹیموں نے امدادی کاروائیاں شروع کردی ہیں اور لوگوں کوعمارت سے نکالا جا رہا ہے۔
دھماکے میں عمارت کی پہلی اور دوسری منزل کو بھی نقصان پہنچا ہے، جبکہ دھماکے کے بعد عمارت میں نصب گیس کے میٹروں سے لیکیج بھی شروع ہوگئی ہے۔
دھماکہ بہت زوردار تھا جس کی آواز دور دور تک سنی گئی، ہر چند کہ ابھی تک دھماکے کی نوعیت کا پتہ نہیں چل سکا تاہم کہا جا رہا ہے کہ یہ سلینڈریا پھر بم دھماکہ ہو سکتا ہے۔
واضح رہے کہ کراچی کے علاقے کیماڑی میں گزشتہ روز بھی دھاکہ ہواتھا جس کے نتیجے میں چار افراد زخمی ہوگئے تھے۔ پولیس کا کہنا تھا کہ بارودی مواد موٹر سائیکل میں نصب تھا۔
