SAHAR

اقوام متحدہ کے سیکریٹری جنرل کے ترجمان نے کہا ہے کہ شام میں اسپتالوں اور اسکولوں پر تباہ کن حملوں کے بارے میں شائع ہونے والی رپورٹوں کے تعلق سے بان کی مون نے اپنی شدید تشویش کا اظہار کیا ہے-

روئٹرز کی رپورٹ کے مطابق اقوام متحدہ کے ترجمان فرحان حق نے اس بارے میں کہا ہے کہ اقوام متحدہ کے سیکریٹری جنرل نے شام کے شہروں حلب اور ادلب میں پانچ اسپتالوں اور دو اسکولوں پر کئے گئے میزائل حملوں پر، کہ جس کے نتیجے میں متعدد بچوں سمیت کم از کم پچاس عام شہری جاں بحق ہوئے ہیں، اپنی گہری تشویش ظاہر کی ہے۔

ان حملوں میں بڑی تعداد میں لوگ زخمی بھی ہوئے ہیں- ایک حملہ عالمی تنظیم ڈاکٹرز ود آئوٹ بارڈرز کے زیرانتظام ایک اسپتال پربھی کیا گیا ہے۔ انہوں نے مزید کہا کہ اس طرح کے حملے بین الاقوامی حقوق کی کھلی خلاف ورزی شمار ہوتے ہیں-