عراق کے شہر فلوجہ میں المناک انسانی صورت حال پر اقوام متحدہ کی تشویش
اقوام متحدہ نے عراق کے شہر فلوجہ میں المناک انسانی صورت حال پر تشویش کا اظہار کیا ہے۔
اطلاعات کے مطابق اقوام متحدہ نے عراق کے صوبہ الانبار میں واقع شہر فلوجہ میں المناک انسانی صورت حال پر تشویش کا اظہار اور اس علاقے میں پرامن انسانی گزرگاہ کے قیام کا مطالبہ کیا ہے۔
عراق میں اقوام متحدہ کے ترقیاتی پروگرام کی نمائندہ لیز گرانڈی نے دہشت گرد گروہ داعش کے زیر قبضہ شہر فلوجہ کی المناک صورت حال پر تشویش کا اظہار کرتے ہوئے اس شہر کے محاصرہ شدہ لوگوں کے لئے انسان دوستانہ امداد کی اپیل کی۔
لیز گرانڈی نے کہا کہ فلوجہ میں گزرگاہ کے قیام کے بعد اقوام متحدہ اس شہر کے لوگوں کے لئے فوری انسان دوستانہ امداد بھیجنے کے لئے تیار ہے۔
قابل ذکر ہے کہ داعش گروہ نے اپنی نئی جارحیت میں عورتوں، بچوں اور بوڑھوں سمیت فلوجہ کے دسیوں افراد کو دریائے فرات میں بے دردی کے ساتھ غرق کر دیا تھا۔ فلوجہ شہر دارالحکومت بغداد سے انہتر کلو میٹر کے فاصلے پر صوبہ الانبار کے مغرب میں واقع ہے۔
