SAHAR

بیلجیئم کے دارالحکومت برسلز میں پولیس اور مظاہرین کے درمیان شدید جھڑپ ہوئی ہے

بیلجیئم کی پولیس اور حکومت کے اقتصادی اصلاحات کے پروگرام کے خلاف مظاہرہ کرنے والوں کے درمیان برسلز میں اس وقت شدید جھڑپ ہوئی جب مظاہرے کے شرکا نے شہر کے مرکز میں حکومت کے خلاف شدید نعرے لگانا شروع کر دیئے -

مظاہرین نعرے لگا رہے تھے کہ اب ہم اس سے زیادہ برداشت نہیں کر سکتے- حکومت نے اقتصادی اصلاحات کے تحت جو پروگرام نافذ کیا ہے اس میں ملازمین کے روزانہ کے کام کے گھنٹے بڑھا دئے گئے ہیں جبکہ تنخواہیں کم کر دی گئی ہیں - ان اصلاحات کی بنیاد پر فکیٹریوں، کارخانوں اور کمپنیوں کے مالکان اپنے ملازمین سے ہفتے میں پنتالیس گھنٹے کام لیں گے -

بیلجیئم کی لیبریونین کے ایک عہدیدار نے کہا کہ ملازمین کے کام کے گھنٹوں میں اضافے سے سب کو نقصان پہنچے گا - حکومت کے اقتصادی اصلاحات کے پروگرام کے خلاف بیلجیئم کے ریلوے کے ملازمین اکتیس مئی کو ملک گیر ہڑتال کرنے والے ہیں - جبکہ جون، ستمبر اور اکتوبر میں بھی اسی طرح کی ہڑتالوں کا اعلان کیا گیا ہے -