پاکستان میں چین کے فوجی اڈے سے متعلق امریکی دعوی مسترد
چین نے پاکستان میں فوجی اڈے کے قیام کی خبروں کو قیاس آرائیاں قرار دے کر مسترد کر دیا ہے۔
غیر ملکی خبر رساں ایجنسی کے مطابق چینی وزارت دفاع کے ترجمان کرنل ووچیان نے کہا ہے کہ پاکستان میں چین کے فوجی اڈے کے قیام کی خبريں قیاس آرائیوں پر مبنی ہیں اور ان میں کوئی صداقت نہیں ہے۔ انہوں نے اس قسم کی خبروں کو منگھڑت قرار دیتے ہوئےمسترد کر دیا ہے۔
چینی وزارت دفاع کے ترجمان سے جب نیوزبریفنگ کے دوران یہ پوچھا گیا کہ کیا چین، پاکستان کے پورٹ سٹی گوادر میں بحری اڈہ بنانے کی منصوبہ بندی کر رہا ہے تو انہوں نے کہا کہ یہ باتیں محض قیاس آرائیوں پر مبنی ہیں ۔
واضح رہے کہ رواں ماہ کے آغاز میں امریکی محکمہ دفاع پینٹا گون نے ایک رپورٹ جاری کی تھی جس میں اس بات کا اشارہ دیا گیا تھا کہ چین ممکنہ طور پر مستقبل میں پاکستان کے اندر اپنا فوجی اڈہ قائم کرسکتا ہے۔
پینٹاگون کی رپورٹ میں یہ بھی کہا گیا تھا کہ افریقی ملک جبوتی میں فوجی اڈے کے قیام کے بعد چین دیگر ممالک میں بھی اپنے اڈے قائم کرنے کی منصوبہ بندی کر رہا ہے۔
