امریکہ کو پاکستان کی ضرورت ہے: مائیکل موریل
امریکی سی آئی اے کے سابق سربراہ مائیکل موریل نے واضح طور پر کہا ہے کہ پاکستان کوامریکا کی نہیں بلکہ امریکہ کو پاکستان کی ضرورت ہے۔
موصولہ رپورٹوں کے مطابق امریکی سی آئی اے کے سابق سربراہ مائیکل موریل نے ایک انٹرویو میں کہا کہ امریکا کا پاکستان پر ناجائز دباؤ کا حربہ کارگر نہیں ہو گا البتہ اس دباؤ سے پاکستان کے بجائے امریکا کو نقصان پہنچ سکتا ہے ۔
انہوں نے کہا کہ پاکستان امریکی امداد سے آزاد ہو چکا ہے، اسے چین جیسے دوست کی امداد حاصل ہے اور امریکا کو پاکستان کی فضائی اور زمینی راستوں کی ضرورت ہے جس کے تعاون کے بغیر یہ جنگ امریکا جیت ہی نہیں سکتا۔
مائیکل موریل نے کہا کہ صدر ٹرمپ کی پالیسی واضح نہیں ہے اورنہ ہی انھوں نے کوئی پلان دیا ہے کہ کتنی فوج بھیجی جائے گی اور اس کا کردار کیا ہوگا۔
واضح رہے کہ امریکی صدر ٹرمپ کے بیان کے بعد پاکستان اور امریکہ کے تعلقات اپنی تاریخ کے پیچیدہ ترین موڑ پر پہنچ چکے ہیں اور پاکستان نے بطور احتجاج اپنے وزیر خارجہ کے دورہ امریکہ کو بھی منسوخ کرتے ہوئے پاکستان میں تعینات امریکی سفیر کو دفتر خارجہ میں طلب کرنے کا بھی فیصلہ کر لیا ہے۔
