امریکہ کے جنگلات میں آتشزدگی، 800 مکانات تباہ
امریکی ریاست کیلی فورنیا کے جنگلات میں 8 روز سے لگی آگ 2 لاکھ 30 ہزار ایکڑ رقبے پر پھیل گئی، 800 مکانات اور عمارتیں جلنے سے دولاکھ سے زائد افراد بے گھر ہوگئے اور 5 ہزار سے زائد فائر فائٹرز آگ سے لڑنے میں مصروف ہیں۔
جنوبی کیلی فورنیا کے جنگلات میں لگی یہ آگ 2 لاکھ 30 ہزار ایکڑ رقبے پر پھیل چکی ہے جو کہ امریکی شہروں نیویارک اور بوسٹن کے مشترکہ رقبہ سے بھی زیادہ ہے۔
کیلی فورنیا کی تاریخ کی پانچویں بڑی آتشزدگی ہے اور اس آگ کو ’’تھوماس فائر‘‘ کا نام دیا گیا ہے۔
تیز ہوا اور دھوئیں کے بادلوں کی وجہ سے فائر فائٹرز کو اپنے کام میں مشکلات کا سامنا ہے، آگ کے سبب بہت بڑے علاقے میں بجلی کی فراہمی منقطع ہوچکی ہے، متعلقہ اداروں نے کیلی فورنیا کے دیگر شہروں لاس اینجلس اور وینچورا میں انتباہ جاری کردیا ہے۔
محکمہ موسمیات نے کہا ہے کہ ہوا میں نمی کا تناسب کم ہونے اور تیز ہوا کے سبب آگ مزید پھیل رہی ہے جب کہ اگلے 10 روز تک بارش کے کوئی آثار نظر نہیں آرہے۔
قبل ازیں کیلی فورنیا کے جنگلات میں 1932ء میں ایسی آگ لگی تھی تاہم وہ بھی دو لاکھ 20 ہزار ایکڑ رقبے تک پھیلی تھی لیکن تھوماس فائر اس سے کہیں زیادہ بڑی ہے۔
