پاک و ہند کی شرکت سے شنگھائی تعاون تنظیم کی فوجی مشقیں
شنگھائی تعاون تنظیم کے تحت روس میں یورال کی پہاڑیوں میں ہونے والی فوجی مشقوں میں چھ ملکوں کے فوجی اہلکار حصہ لیں گے جن میں پاکستانی اور ہندوستانی فوجی اہلکار بھی شامل ہیں۔
ہندوستاتی ذرائع کے مطابق فوجی مشقوں میں پاکستان اور ہندوستان کے ساتھ ساتھ چین اور روس کے فوجی اہلکار بھی شریک ہیں، یہ مشقیں روس میں یورال کے پہاڑی سلسلے میں ہو رہی ہیں۔
رپورٹ کے مطابق چینی ماہرین کا کہنا ہے کہ فوجی مشقوں میں پاکستانی اور ہندوستانی اہلکاروں کی اکٹھے شمولیت سے دونوں پڑوسی ملکوں میں جاری تناؤ کم کیا جا سکتا ہے۔
آزادی کے بعد پاکستان اور ہندوستان پہلی مرتبہ مشترکہ فوجی مشقیں کریں گے، اس سے پہلے دونوں ملکوں کی افواج اقوام متحدہ کے امن مشن میں ساتھ کام کر چکی ہیں۔
یورال پہاڑیوں میں ہونے والی فوجی مشقوں کو امن مشن دو ہزار اٹھارہ کا نام دیا گیا ہے۔
روسی وزارت دفاع کا کہنا ہے کہ فوجی مشقوں میں شریک فوجوں کے چیفس آف جنرل اسٹاف ان مشقوں کے دوران آپس میں ملاقاتیں بھی کریں گے، یہ مشقیں شنگھائی تعاون تنظیم کی اٹھارہویں کانفرنس کے بعد ہوں گی جو نو اور دس جون کو چین کے ساحلی شہر چنگ ڈاؤ میں منعقد ہو رہی ہیں۔
