SAHAR

آئی سی سی ٹی ٹوئنٹی ورلڈ کپ میں جنوبی افریقہ نے بنگلہ دیش کو دلچسپ مقابلے کے بعد چار رنز سے شکست دے دی۔

سحر نیوز/ دنیا: نیویارک میں کھیلے گئے ٹی20 ورلڈ کپ کے گروپ ڈی کے میچ میں جنوبی افریقہ نے ٹاس جیت کر پہلے بیٹنگ کا فیصلہ کیا۔

گزشتہ میچ کی طرح اس مرتبہ بھی جنوبی افریقی ٹیم کی اننگز کا آغاز مایوس کن رہا اور گیارہ رنز پر ریزا ہینڈرکس پویلین لوٹ گئے۔ جنوبی افریقہ نے مقررہ اوورز میں چھ وکٹوں کے نقصان پر ایک سو تیرہ رنز بنائے۔

بنگلہ دیش کی جانب سے تنظیم نے تین جبکہ تسکین نے دو وکٹیں لیں۔

ہدف کے تعاقب میں بنگلہ دیش کے بلے باز بھی مشکلات سے دوچار نظر آئے اور پچاس رنز پر اس کے چار بلے باز پویلین لوٹ چکے تھے۔

بنگلہ دیش کی ٹیم مقررہ اوورز میں سات وکٹوں کے نقصان پر ایک سو نو رنز بنا سکی اور جنوبی افریقہ نے سنسنی خیز مقابلے میں چار رنز سے فتح اپنے نام کر لی۔

تین چھکوں اور دو چوکوں کی مدد سے چھیالیس رنز بنانے والے کلاسن کو میچ کا بہترین کھلاڑی قرار دیا گیا۔